Casteddu. S'assessore a s'Urbanìstica, Cristianu Erriu, carcat su pedale de s'atzeleradore pro serrare in lestresa sas consultatziones, cun su fine de collire sos cunsìgios pro su megioru de su Pianu paesagìsticu regionale e aprovare sa lege urbanìstica.
Cras, mèrcuris 16 de abrile, in sa sala riuniones de s'assessoradu a sos Entes Locales, Finàntzias e Urbanìstica, Erriu at a addobiare asas 10 sos rapresentantes de sos entes locales, de sas universidades de Tàtari e Casteddu, de sos cunsòrtzios de bonìfica e industriales, de sas àeras marinas protetas e de sos parcos. A sighire, addobiu cun sas organizatziones sindacales, cun sos òrdines e sas categorias professionales de sos ingenieris, geòlogos, geometras, architetos, peritos industriales e agrarios.
«Semus traballende abberu – at naradu s'assessore Erriu – e gratzias a su contributu de totus semus pongende umpare totus sas propostas e sos cunsìgios subra su Ppr. A un'ala amus a megiorare sas tutelas e, a s'àtera, amus a semplificare sas protzeduras e sas autorizatziones in matèria de urbanìstica».
Su rapresentante de sa Giunta, gioja passadu at fatu unu primu giru de consultatziones cun totus sos assòtzios de categoria, su mundu de sos imprendidores, sos ambientalistas e sos consumadores.
«Sa manutentzione de su Ppr est netzessària – at sighidu Erriu – ma est detzisivu finas aprovare sa lege urbanìstica noa ed eliminare sos ritardos in sas istrutòrias de sas pràticas. Sos tzitadinos e sas impresas no ant a dèpere suportare prus sas longàrias inùtiles de sa burocratzia».
"Progetu realizadu cun sa partetzipatzione de sa Regione Autonoma de Sardigna - L.R. 26/97 subra sa limba e sa cultura sarda"
© Riproduzione non consentita senza l'autorizzazione della redazione
